ФТ: Брисел останува неподготвен пред кинеската иницијатива „16+1“

28 ноември, 2017 | 16:11 часот | 261 прикажувања |

Брисел е неподготвен додека Кина пружа рака кон Источна Европа, објави „Фајненшел тајмс“ истакнувајќи дека постои загриженост во Европска унија за се поблиските врски на Пекинг со „сиромашните нации во Европа“.

„Ваков регионален пристап наидува на голем сомнеж, не само во Брисел, туку и во другите главни градови на голем број земји членки на ЕУ“, изјави неименуван дипломат за „Фајненшел тајмс“.

Друг висок дипломат од една европска држава наведува дека тоа е само „врв на ледениот брег“.

„Самитот 16+1 се однесува на низа работи, а некои од нив задираат и во компетенцијата на ЕУ или се движат кон нови области во кои веќе постојат иницијативи помеѓу самата ЕУ и Кина“, посочи дипломатот за „Фајненшел тајмс“.

Лондонскиот весник забележува дека додека учесниците на Самитот, како што се Унгарија („отворање кон Исток“ и „голема можност’“) и Србија („лепило за големо пријателство“) ја фалат иницијативата, дипломатите во Брисел се плашат дека Кина ќе ја искористи иницијативата 16+1 да ги поткопа правилата на ЕУ и ќе ги искористи тензиите помеѓу Истокот и Западот во самиот блок.

„Фајненшел тајмс“ како две големи грижи за ЕУ ги наведува „се поголемите напори да се користи влијанието во Централна и во Источна Европа да се влијае на заедничката европска политика кон Кина“ и тоа што „некои држави од 16+1 своите врски со Кина ќе ги искористат за подобра преговарачка позиција во Брисел“.

„Европските дипломати стравуваат дека таквата динамика би можела да влијае врз ефикасноста на Брисел во често комплицираните односи со другите најголеми трговски партнер. Кина бара гарантирани договори за своите компании, што е во спротивност со пазарните правила во ЕУ и прописите за јавните набавки“, наведува „Фајненшел тајмс“.

Весникот додава дека Европа е шокирана и од договорите што се склучуваат на самитот 16+1, меѓу кои е и унгарскиот договор за железничка пруга Белград – Будимпешта, кои се контроверзни. Воглавно се работи за изостанување на тендери и склучување на договори што ЕУ ги истражува, за да се утврди дали се кршат правилата на Унијата.

извор: МИА