Во Скопје пријавени пет улични разбојништва во период од еден час

26 ноември, 2017 | 13:24 часот | 205 прикажувања |

Пет кривични дела „разбојништво“ биле извршени вчеравечер во Скопје во периодот од 18.50 до 19.30 часот. Полицискиот дневен Билтен во петте разбојништва како сторители наведува две непознати лица кои ограбувале луѓе заканувајќи се со нож.

Првото разбојништво се случило во 18.50 часот на бул. „Партизански одреди“ кога било извршено разбојништво над Т.Г., и му биле одземени 300 денари и слушалки од мобилен телефон. Околу 19 часот на бул. „Партизански одреди“, во близина на Универзална сала, разбојништво било извршено над М.П., при што со закана со нож му биле одземени пари.

Околу 19 часот, на ул. „Даскал Камче“ две непознати лица со закана со нож извршиле разбојништво над С.С. и Д.Д., при што им одзеле околу 400 денари и побегнале. Околу 19.30 часот на автобуската станица кај Трговскиот центар Буњаковец две непознати лица со закана со нож извршиле разбојништво над А.Р. одземајќи му околу 500 денари и побегнале.

Петтото разбојништво било исто така во 19.30 часот на ул. „Иван Козаров“ кога две непознати лица со закана со нож извршиле разбојништво над тројца малолетници, при што им одзеле 500 денари и побегнале.

МВР презема мерки за пронаоѓање на сторителите и за целосно расчистување на сите случаи.