Два конгреса за избор на партиски лидер, двата со логото на Беса

12 февруари, 2018 | 17:07 часот | 545 прикажувања |

Разногласие во Беса за датумот на одржување на конгресот, на кој ќе се избира нов партиски лидер. Поддржувачите на привремениот претседател Неџбедин Каремани информираа дека во тек се подготовките за конгресот кој иако претходно го најавија за 24 февруари, сега велат дека се договориле тој да се одржи една недела порано, на 18 февруари во Тетово.

Повеќе детали не откриваат, но велат дека сите чекори што ќе ги преземат од ова крило на партијата ќе бидат познати по конгресот бидејќи минатата недела судот пресече дека претседател на партијата до одржување на конгресот е Билал Касами, пренесе Макфакс.

Касами и неговите поддржувачи, пак, апелираат граѓаните да не се доведуваат до забуна, единствениот конгрес, според нив, ќе се одржи на 24 февруари во Скопје.

„Оваа одлука сме ја донеле сите заеднички вклучувајќи ja и таа мала група незадоволни кои денес зачудувачки излегуваат со шпекулации за манипулирање на јавноста за некоја друга дата. Ова уште еднаш докажува дека оваа мала група е научена да не почитува одлуки на органите и Статутот на партијата. Бидејќи во јавноста секој ден се шират шпекулации дека ќе се формира нова политичка партија, ние им посакуваме успех, но им апелираме да не манипулираат со членовите и симпатизерите на Движењето Беса“, вели портпаролот на Беса, Абдуш Демири.

Несогласувањата во Беса почнаа неодамна кога во ист ден беше одржан централен совет на партијата, но едниот во Скопје, а другиот во Tетово, на кој беа донесени различни одлуки за одржување конгрес. Во Тетово одлучија до одржувањето на конгресот со партијата да раководи актуелниот Билал Касами, а во Скопје мнозинството го избра пратеникот Неџбедин Карамани за привремен лидер на Беса.

извор: Макфакс