ВМРО-ДПМНЕ: Само во Македонија патриотите се прогласуваат за терористи

21 јануари, 2018 | 10:25 часот | 506 прикажувања |

Само во Македонија, видни личности, патриоти, кои немаат сторено ниту прекршок се прогласуваат за терористи. Власта безобразно и на очиглед на сите ги злоупотребува институциите на системот за политичко пресметување со неистомислениците. Судовите не се ни трудат да ја запазат правната постапка. Во решенијата што се доставени до правните застапници на обвинетите воопшто нема образложенија или тие не соодветствуваат со фактичката состојба, соопшти ВМРО-ДПМНЕ.

„По повеќе од десет дена сеуште не се добиени решенијата за притвор за некој од уапсените што јасно укажува на фактот дека ова не е правен процес туку политичка пресметка.

Владата на СДСМ судиите ги претвори во политички пиони кои ги користи за дневно политички потреби, целосно уривајќи го угледот и честа на судовите како институции кои треба да дејствуваат независно од извршната власт.

Самиот факт што вишото јавно обвинителство ги нарекува обвинети оние кои се политички осомничени за настаните од 27 април е доволен доказ дека некој сака да ги издиктира и пресудите, а судот треба молчешкум да ги изрече.

Веќе два месеци Дурловски, Илиевски, Јовановски, Чавков, Дамовски и останатите се држат во притвор само затоа што си ја сакаат својата татковина и гласно се спротиставуваа на плановите на оваа влада за нејзино редефинирање. Нивниот притвор е обид да се замолчи и попречи секое спротиставување на погубните политики на владата на СДСМ.

Република Македонија е единствена држава аспирант за влаз во Европската Унија во која има политички затвореници. Со ова владата на СДС Македонија ја стави во ранг на диктатурите од третиот свет во кои се применуваат вакви методи за пресметка со неистомислениците. Политичките слободи и слободата на говорот се основните права на цивилизираните општества, какво што се стремиме да станеме. Во Македонија владее тотален мрак.

Обвиненијата за тероризам се апсурдни конструкции и измислици со кои се праќа порака на сите кои сакаат да го кренат својот глас за работите во кои веруваат.

Срамна и политичка е одлуката на Апелациониот суд за продолжување на притворите на патриотите Дурловски, Јовановски, Дамовски, Илиевски, Божиновска, Чавков, Мукоски и останатите кои застанаа на браникот на татковината.

Законите мора да важат подеднакво за сите, а не да се применува селективна правда. Блискоста со власта на пратеникот Павле Богоевски му донесе експресно повлекување на обвинувањата за штетите кои очигледно ги предизвика за време на таканаречената шарена револуција, додека другите обвинети за истите случувања и понатаму ќе мора да одговараат за истите обвинувања.

Политичкиот реваншизам и малтретирање на луѓе кои размислуваат поинаку од СДСМ мора да запре. Бруталното замолкнување и заплашување на сите кои не се согласуваат со деструктивните политики на власт на СДСМ ќе го зголеми револтот на граѓаните кои бараат правда“, соопшти ВМРО-ДПМНЕ.