Мицкоски: Дијалогот власт-опозиција е двонасочна улица

18 јануари, 2018 | 18:07 часот | 511 прикажувања |

Претседателот на ВМРО-ДПМНЕ Христијан Мицкоски оствари средба со шефицата на Мисијата на ОБСЕ во Скопје, Нина Суомалајнен, на која разговараа за стратешките приоритети на државата, актуелната политичка состојба и реформските процеси важни за Република Македонија.

На средбата, Мицкоски истакна дека ВМРО-ДПМНЕ секогаш ќе биде конструктивен фактор во градењето на политичкиот амбиент за реализација на реформските зафати кои треба да донесат подобрување на квалитетот на животниот стандард и таквата конструктивност е базирана на принципиелни и разумни основи.

Мицкоски како сериозен проблем го посочи политичкиот прогон кој го врши власта врз опозицијата и дека тоа воопшто не придонесува кон решавање на општествените и политичките процеси кои се во застој.

На разговорите беше посочено дека пратеничката група на партијата нема да учествува во работата на Собранието се додека не се создадат услови за нормално, демократско функционирање на оваа институција.

Мицкоски исто така кажа дека за да се забрзаат интеграциските процеси на државата потребен е дијалог со владата, а самиот процес е двонасочна улица на исполнување на обврски и одговорности.

Претседателот на ВМРО-ДПМНЕ истакна дека постои загриженост околу реформскиот процес и под знак прашање се доведуваат економските параметри а со тоа и недостаток на капацитет кај оваа влада да ги реализира започнатите реформи посочи Мицкоски.