СЈО се откажа од барањето за замрзнување на седиштето на ВМРО- ДПМНЕ

17 декември, 2017 | 18:31 часот | 1.107 прикажувања |

Пред 5 дена (на 12.12..2017) СЈО се откажало од барањето за заштита на законитост со кое бара замрзнување на имотот на ВМРО-ДПМНЕ односно на нивното партиско седиште. СЈО со барањето за заштита на законитоста сметаше дека Врховниот суд треба да ги поништи сите претходни судски одлуки кои оневозможуваа замрзнување на партискиот имот во рамките на истрагата Талир.

Одлуката на Врховниот суд со која се отфрла ова БЗЗ е објавена на сајтот на судот и е донесена два дена откако СЈО го испратило своето откажување од белата палата на ВМРО-ДПМНЕ.

„Барањето за заштита на законитоста се отфрла. Според член 460 став 1 од Законот за кривичната постапка, ако јавниот обвинител го повлече барањето за заштита на законитоста, судот со решение ќе го отфрли барањето“, пишува во одлуката на Врховен, донесена на 14.12.2017.

Од СЈО нема одговор за причините поради кои се откажале од барањето за замрзнување на партискиот имот на поранешната владеачка партија, пишува Телма.

СЈО бараше замрзнување на имотот, но судовите го одбија барањето, за на крај преку БЗЗ случајот да биде донесен во Врховниот суд. По две расправи во септември, СЈО пред 5 дена одлучило да се повлече од барањето за замрзнување на имотот на ВМРО-ДПМНЕ.