Тетовското обвинителство гони лице кое со нож нападна и повреди дете

27 јули, 2018 | 19:18 часот | 637 прикажувања |

Јавен обвинител од Основното јавно обвинителство Тетово донел наредба за спроведување истражна постапка против едно лице за сторено кривично дело „полов напад врз дете кое не наполнило 14 години“ од член 188, став 1 од Кривичниот законик.

„Осомничениот се гони за дело кое го сторил на 25 овој месец, кога околу 17:00 часот откако го забележал детето, се скрил под балкон на станбен објект и го повлекол детето кон него. При тоа со нож неколку пати ја расекол по екстремитетите и нанел 20 до 30 гребнатини по стомакот, по што извршил полови дејствија. Детето успеало да се одбрани удирајќи го осомничениот и барајќи помош од другарите“, соопшти попладнево Обвинителството.

Надлежниот јавен обвинител ценел дека се исполнети законските основи за определување на мерката притвор за осомничениот и доставил предлог до Основниот суд Тетово. Судот го прифатил предлогот на Обвинителството, па со решение му изрекол мерка притвор на осомниченото лице во времетраење од 30 дена.​